12,000 na nagparehistro sa IEC

CEBU, Philippines – Nikabat na sa 12,000 ka delegado ang nagparehistro sa 51st International Eucharistic Congress (IEC) nga ipahigayon sa Sugbo sunod semana.

Si Bishop Dennis Villarojo, secretary-general sa IEC 2016, nibutyag nga niabot na sa gidaghanon ang nagparehistro apan ang ila’ng giandaman mao ang 15,000.

Subay niini, gibutyag ni Villarojo nga adunay 600 ka pamilya sa Mandaue ug Dakbayan sa Sugbo ang magpapuyo og mga delegado isip mga host families.

Dunay ubang pamilya nga dili sa ila’ng balay mopuyo ang mga delegado apan sila ang ni-sponsor sa mga gipuy-an niini’ng pension houses.

Sa laing bahin, gibutyag ni Villarojo nga nikabat na sa P24 milyones ang natigum sa tanang simbahan lukop nasud sa ila’ng fund raising nga “Piso Para sa Misa ng Mundo” nga nasugdan sa niagi’ng tuig.

Ang mao’ng pundo gamiton sa ubang galastuhan  sa IEC sama sa transportasyon sa mga delegado ug pagkaon sa mga volunteers apan wala’y labot niini ang accommodation o sa puy-an nga hotel o pension house sa mga delegado.

Ang mga delegado ang mobayad sa ila’ng accommodation gawas sa mga wala gisagop sa host families. – /GMR) (BANAT NEWS)