Kapin 2M niprosisyon

CEBU, Philippines – Bisan sa naglagiting ang kainit sa haring adlaw, wala matandog ang mga deboto nga miduyog sa solemn procession nga nagsugod pasado ala-una kagahapon sa hapon.

Sa pagbanabana sa kapulisan sa dakbayan sa Sugbo miabot og kapin duha ka milyon ang nanambong, mas daghan kini itandi sa nakalabay nga tuig nga miabot sa 1.8 ka milyon.

Matud pa ni Chief Inspector David Señor, hepe sa Police Community Relations (PCR) sa Cebu City Police Office nga nahinabi sa Banat News,  walay bakante sa dalan tungod sa kadaghan sa mga tawong nanambong.

Sumala pa ni Señor nga namatikdan usab sa kapulisan nga gumikan sa kadaghan nga miapil sa prosesyon ang uban igo na lang nagbarog sa kilid sa dalan ug nisunod paglakaw paglabay sa karosa nga nagdala sa Imahen sa Senyor Sto. Niño.

“Pwerteng inita gyud, pero pwerting daghana gihapon sa mga tawo comparing last year, tanan nga rota sa solemn procession napuno,” matud pa ni Señor.

Samtang sa impormasyon nga gipaabot sa Command Control Center sa kagamhanang lokal sa dakbayan sa pagkutlo ning balita pasado alas 4 sa hapon  napulo ka tawo ang gitabang sa medical teams tungod sa pagsaka sa ilang blood pressure bunga sa kainit.

Human sa prosisyon, adunay 10-minutos nga fireworks display nga gihimo diha sa basilica nga nakapalipay sa mga tawo.

Atol usab sa prosisyon, tulo ka mga bata ang gihatod sa buhatan sa Fuente Police Station human nabuwag sa ilang mga kaubang hamtong.

Ang usa sa mga bata adunay gibutang nga kontak number sa iyang ginikanan apan ang selpon dili na makontak.

Si Señor miingon nga anaa sa 1,800,075 ka mga unipormadong pulis ang gipakatap aron mobantay, apan wala pay labot sa uban nga mga pwersa, mga force multipliers nga miabot usab og kaliboan ka mga tawo.

Karong adlawa sa Sinulog Grand Parade gilauman ni Señor nga daghan pang mga tawo ang motambong.

Subli nga gipanawagan sa opisyal ang mga ginikanan nga kung dili kalikayan nga madala ang ilang mga anak butangan gayud sila og “name tags” nga suwatan sa numero sa selpon sa ginikanan ug ilang address aron mas sayon nga mabalik kanila ang mga bata. – /EIM) (BANAT NEWS)