Balay sa kagawad gipabuthan

CEBU, Philippines - Nagpakitabang sa kapulisan sa lungsod sa Asturias ang usa ka barangay kagawad sa Brgy. Lunas human gipabuthan og armas ang iyang balay sa tulo ka mga lalaki niadtong nakalabay nga kaadlawon.

Ang kagawad mao si Evelio Cabase Sr., 62, kasamtangan nga konsehal sa maong barangay.

Matud pa ni Senior Police Officer 4 Joseph Mangle sa Asturias Police nga nahinabi sa Banat News ang gitudlo nga suspek sa hitabo ang mag-agaw nga sila si Michael Lumactud ug Randel Lumactud ug ang usa ka alyas Jason.

Sumala pa ni Mangle nga ang tulo nalambigit sa ilegal nga drugas sa maong dapit ug nasuko sila sa konsehal kay mao kini ang mibarog nga testigo sa gihimong drug raid operation sa kapulisan sa maong barangay pipila ka adlaw na ang nakalabay diin lima ka mga tawo ang nadakpan.

Matud pa nga ang tulo luwan sa usa ka motorsiklo ug daling nangikyas human gipaarakan ang balay sa opisyal.

Tulo ka mga basiyo sa bala sa .45 kalibreng armas ug tulo ka mga bala nga wala makabuto ang narekober gikan sa gawas sa balay sa konsehal.

Ang konsehal mopasaka og kasong grave threats batok sa tulo ka mga suspetsado nga padayon pa nga gipangita sa kapulisan.

Subay sa balaod sa Republic Act 9165, ang mga lokal nga opisyal kinahanglang moabag sa kampanya batok sa ilegal nga drugas diha sa ilang mga lugar ug usa na niini ang pagbarog isip testigo batok sa mga gidudahang drug personalities nga gironda. (BANAT NEWS)