Budget sa Asturias Sinulog dancers gikagubtan

CEBU, Philippines – Gihimakak ni Bise Mayor Joel Dumdum sa Lungsod sa Asturias ang pasangil nga gibabagan sa konseho ang pagpasar sa supplemental budget nga P388,515 nga gamiton unta sa ila’ng pagsalmot sa Sinulog sa Kabataan sa Lalawigan.

Si Dumdum nagkanayon nga gikwestiyon sa iya’ng anak nga si Konsehal Dana Andrew Dumdum kung unsa’y gamitan sa kwarta sanglit wala’y gipataban nga program of works.

Ang in-charge sa tourism sa lungsod nga si Mark Supatan giingong wala usab makaesplikar kabahin sa budget.

Matud ni Bise Mayor Dumdum nga human nila ipatawag si Supatan nikanaug kini ug sa pagbalik may dala na nga breakdown sa gamitan sa budget.

Napasar sa first reading ang supplemental budget apan wala na sa third reading kay naabtan sa recess ug pagtapos sa tuig 2015.

Si Mayor Allan Adlawan niklaro nga adunay gi-attached nga program of works sa supplemental budget ug giingong gibitbit pa ni Konsehal Dumdum.

Matud ni Adlawan nga ang mao’ng kwarta gastuhon unta sa pagkaon sa 550 ka bata nga contingent sa Sinulog sa Kabataan sa Lalawigan ug sa mga props.

Ang Looc Norte National High School sa Asturias ang nidaug sa Sinulog sa Kabataan sa Lalawigan diin ilang nadawat ang  P350,000 ug gikatakda nga subli’ng moapil sa Sinulog Grand Parade karong Domingo.

Gibutyag ni Adlawan nga duna sila’y suporta gikan sa katawhan ug gani niabot sa P1.2 milyones ang nadawat nila’ng donasyon gikan sa katawhan ug mga opisyal sa lungsod nga gigamit sa pagsalmot sa Sinulog sa Kabataan sa Lalawigan. – /GMR) (BANAT NEWS)