Tulo ka tawo nasubhan sa gun ban

CEBU, Philippines – Tulo ka tawo ang nasubhan sa gipatuman karong Comelec gun ban sugod niadtong Enero 10 nga matapos sa Hunyo 8 ning tuiga aron mamenusan ang paggamit niini atol sa piniliay ug mga kalihokan sa mga criminal.

Sa dakbayan sa Lapu-Lapu, usa ka Julius Segovia, 38, ang gidakop  diha sa Purok Kapayas, Barangay Gun-ob, Dakbayan sa Lapu-Lapu sa miaging Domingo sa gabii  human nakuhaan og .38 caliber revolver nga adunay lima ka bala apan walay lisensiya ug gun ban exemption.

Matud pa ni Police Officer 3 Rudy Janagap sa Gun-ob Police Station hubog si Segovia niadtong tungora sa dihang nagpakita kini sa iyahang armas ug naatlan nga maoy pag-agi ni PO3 Bruce Taneo nga nagpuyo sa lugar apan nadestino sa Mandaue Police Station hinungdan nga kini gidakop.

Samtang sa Dakbayan sa Talisay, gidakop ang usa ka Rodel Ampog ug gikasohan og paglapas sa Comelec gun ban, Child Abuse ug Illegal Possession of Firearms human niini gihampak og armas ang usa ka 12 anyos nga dalagita niadtong Domingo sa gabii diha sa Zone 5, Barangay Biasong.

Matud pa ni SPO1 Mikie Espina sa Talisay City Police Station nilaban ang suspek ngadto sa iyang kapuyo nga nakalalis sa inahan sa bata apan ang bata maoy iyang gipahimungtan pinaagi sa paghapos sa iyang pistola sa ulo niini.

Ang bata daling gidala sa tambalanan samtang gidakop sa silingang polis nga si PO3 Roberto Barnido si Ampog ug nasuta nga way lisensiya ang iyang armas.

Samtang ang magtutudlo sa usa ka unibersidad nga si Jeffrey Macolbacol Radoc, 51, kinsa gidakop sa kapolisan human nagpabendisyon sa iyang .357 magnum revolver atol sa Santos nga Misa diha sa simbahan sa Lungsod sa Carmen gipasakaan na usab og kasong paglapas sa Comelec gun ban ug illegal possession of firearms.

Si Comelec provincial officer, Lionel Marco Castillano nagkanayon nga alang sa kaayohan sa tanan ang gun ban.

Atol sa  checkpoint, kinahanglang mangayo og  kortesiya ang mga polis, gibutang sa hayag nga lugar,  adunay markadong patrolcar, unipormado ang mga polis, kinahanglang adunay commissioned officer nga mangulo kanila, mananghid kung kinahanglang rekisahon ang tawo ug uban pa. – Romeo T. Limpangog ug Brenda Batuto/EIM) (BANAT NEWS)