Tulo na-rescue sa NBI

CEBU, Philippines – Tulo ka menor de edad kinsa usa niini taga lungsod sa Poro, isla sa Camotes ang naluwas sa gipahigayong operasyon sa National Bureau of Investigation (NBI) niadtong Enero 9, 2016 sa gabii ubos sa pagtabang sa Provincial Women’s Commission (PWC) gikan sa 4’S Jomeruche’s Resto  Bar sa Santa Cruz, Laguna.

Duha sa maong menor kinsa nagpanuigon pareho og 16-anyos taga Quezon Province ug Rizal Province samtang ang laing usa nga taga Camotes nagpanuigon og 17-anyos.

Gidakop ang magtiayong Nelson, 40 ug Mheann Lacsa, 31 nga giingong maoy nagdumala sa  nahisgutang restobar ug gidala sa mga NBI agents nga gilangkuban nila ni Agapito Gierran ug Rey Villordon nganhi sa Sugbo.

Ang amahan ni Mheann nga si Domingo Malaza maoy  gitumbok nga tag-iya sa maong resto bar, apan nakaikyas kini uban kanila ni Patricia “Didith” Malaza,  ug ang taga Poro, Camotes nga sila si Carmel May Andrade Bensig ug uyoan niining bayot nga si Nicole Bensig alyas “Tita Nicole”. Ang magtiayong Lacsa mihimakak sa mga pasangil batok kanila. Si Mheann nagkanayon nga cashier lang siya sa maong resto bar ug ang iyang bana igo rang misuroy sa lugar.

Si Atty. Ricardo Diaz, director sa NBI-7 mibutyag nga ang menor nga taga Camotes nagtrabaho diha sa Barangay Guadalupe, dakbayan sa Sugbo isip yaya apan nahaylo kini ni Carmel ug Nicole ngadto sa Santa Cruz, Laguna.

Niadtong Enero 8, 2015 ang mga ginikanan sa 17-anyos nangayo og panabang sa NBI-7 sa pag-rescue sa biktima human kini misumbong nga gipatrabaho siya isip entertainer sa nahisgutang resto bar.

Sa imbestigasyon sa NBI giingong ang menor gihaylo sa iyang higala nga si Carmel May nga motrabaho isip sales lady ngadto sa Manila.

Nahibaw-an na lang sa inahan niadtong Enero 4, 2016 atoa na sa Manila iyang anak nga wala  mananghid kaniya ug gidala diay kini sa bar.

Ang menor naka-text sa iyang inahan ug  nisumbong    bahin sa  iyang gitrabahoan tungod kay bastuson sila sa mga lalaki ug gibutang-butangan sila og utang sa tag-iya sa resto bar aron dili kini makapauli.

Ang mga suspetsado gikatakdang pasakaan og kasong “qualified human trafficking in persons.” – /EIM) (BANAT NEWS)