CEBU, Philippines – Nakaangkon og samad tinigbasan sa ulo ug buko–buko ang 44 – anyos nga lalaki kinsa nibalibad sa paghatag og sigarilyo sa iya’ng higala sa Barangay Langtad, Siyudad sa Naga.
Sigun sa inisyal ngaS imbestigasyon ni PO2 Jason Panilag sa Naga City Police Station, ang biktima nga si Renato Carizon Alega nagpuyo sa mao’ng lugar ang gitigbas sa usa ka Raul Villarin.
Matud pa nga samtang ang duha nagtabi–tabi atubangan sa usa ka tindahan, kalit lang nga nangayo si Villarin og sigarilyo sa biktima.
Diha’ng nibalibad si Alega, nilanit ang suspek og sundang nga pangbugha sa kahoy ug sa wala’y daghang estorya gitigbas ang biktima sa ulo apil na ang likod nga bahin sa lawas.
Nikaratil dayon og dagan si Villarin human sa insidente.
“Dili ra kaayo lawom ang nahiaguman nga samad sa biktima kay dili man hait ang sundang nga gigamit sa suspek. Human ato, gidala siya sa Minglanilla District Hospital aron matambalan. Didto siya gi-dresingan ug gipa-medical unya gitambagan sa doktor nga mopahuway,” dugang ni PO2 Ramil Baruman.
Kagahapon sa buntag nipasaka na og reklamo si Alega batok kang Villarin kinsa kasamtangang nagtago–tago. – /GMR) (BANAT NEWS)