Minus nakuotan sa Basilica

CEBU, Philippines – Nakatala og duha pa lang ka kaso sa pagpanguot ang Waterfront Police Station sukad gisugdan ang Misa Novena sa kapistahan sa Balaang Bata nga si Senior Santo Niño sa Basilica niadtong Enero 7 hangtud kagahapon sa udto hinuon usa niini ang nabalik ra ngadto sa tag-iya.

Kini ang gibutyag sa pangulo sa operations sa Waterfront Police Station, Police Officer 3 Ericson Almerez.

Matud ni Almerez nga unang nakuotan niadtong Enero 7 si Jeffrey Paglinawan, 30-anyos, minyo nga taga Compostela, Cebu ug nakuhaan kini og cellphone ug pitaka nga adunay sulod nga kwarta nga mokabat sa P2,500.

Sumala pa ni Almerez nga adunay ikaduha nga nakuhaan niadtong petsa 8 apan nabalik ra dayon sa babaye nga tag-iya tungod kay dali nga nabantayan.

Giawhag ni Almerez ang katawhan nga magmatngon sa ilang mga gamit tungod sa kadaghan ug kabaga sa mga tawo nga mohugop sa Basilica Minore del Sto. Niño.

Gibutyag ni Almerez nga aduna sila’y mga sakop nga gipakatap sa matag ganghaan ug palibot sa simbahan aron motabang ug mobantay para mapatuman ang kahapsay ug kalinaw. – /GMR) (BANAT NEWS)