CEBU, Philippines - Hingpit na nga masulbad ang dugay na nga suliran sa pagbaha sa Sitio Batiller, Umapad, Dakbayan sa Mandaue nunot sa kaugmaran sa Phase 2 sa drainage system nga mokabat sa P21 milyones.
Si Barangay Umapad Kapitan Nelson Rubio niingon nga nagsugod na ang kaugmaran sa proyekto nga gikatakda nga mahuman sunod buwan.
Matud ni Rubio nga nahimo’ng suliran sa mga nagpuyo sa nahisgutang lugar ang pagbaha sa matag higayon nga kusog ang pagbunok gumikan sa pagpundo sa tubig nga molungtad pa og pipila ka adlaw una mohubas.
Ang drainage project mao’y subayan sa tubig paingon sa Mactan Channel.
Ang Phase 1 nahuman na nga nanukad sa ubos nga bahin sa Marcelo Fernan Bridge sa kantidad nga P30 milyones.
Gipaningkamutan ni Rubio nga masugdan na ang Phase 2 aron mahuman na usab ang dugay na nga problema sa baha sa mga molupyo. (BANAT NEWS)