Drayber patay, bugoy angol sa pagpamusil

CEBU, Philippines – Patay ang usa ka drayber sa motor human gipusil sa wala mailhi’ng lalaki pasado alas 6 sa niaging gabii sa Barangay Cogon, Lungsod sa Dumanjug.

Giila sa kapolisan ang namatay nga si Ronilo Meguizo, 35, drayber sa habal-habal, taga Cotcoton, Dumanjug.

Base sa imbestigasyon sa kapolisan nga ang biktima nagmaneho sa iyang motor gikan sa Poblacion padulong sa iyang balay sa Cotcoton.

Apan dihang naabot siya sa Barangay Cogon kalit lang gipaulanan og bala sa wala mailhi’ng tawo.

Naigo ang biktima sa likod nga bahin sa iyang ulo nga mao’y gikamatyan niini.

Bisan pa man sa pagka-igo sa ulo, ang mga polis nidala gihapon niya sa tambalanan apan gideklarar na siya nga patay na sa Barili District Hospital.

Base sa pakisusi sa kapolisan nga ang biktima may pending pa nga kaso sa pagbisita og usa ka drug den.

Gisusi pa sa kapolisan kung may nakakita ba sa hitabo aron maila kun kinsa ang nipusil patay sa biktima ug matino ang motibo.

Samtang bugoy-bugoy nga adis-adis ang gipusil sa wala mailhi’ng tawo sa Maraat, Matab-ang, Dakbayan sa Toledo niadto’ng Biyernes sa gabii. Ang biktima mao si Patrick Ian Panday, 33-anyos, nagpuyo sa nahisgutang lugar.

Matud ni PO3 Carlos Balwado sa Toledo City Police Station nga ang biktima nagsakay sa iyang bisekleta ug kalit kining gipusil sa wala mailhing tawo tumong sa iyang ulo gamit ang armas nga kalibre .45.

Nahagba ang biktima sa karsada samtang nisibat ang mamumuno.

Ang biktima nga gidala sa tambalanan giingong adis-adis ug badlungon sa ilang lugar ug gituohan nga posible’ng gipusil kini tungod sa iyang binuhatan. (/GMR) (BANAT NEWS)