Nangilad og resort napriso

CEBU, Philippines – Gidakop sa kapolisan ang usa ka lalaki human nagpakaaron-ingnon nga magpa-book og 11 ka adlaw nga accommodation pinaagi sa online booking apan nasuta nga peke ang iya’ng gipresentar nga booking voucher sa usa ka resort and spa sa San Fernando kagahapon sa hapon.

Ang gidakop naila nga si Ryan Jay Matbagon Hernan, 29, taga Lipata, Minglanilla.

Siya gidakop human siya gireklamo sa empleyada sa usa ka resort sa North Poblacion nga niilad kanila.

Base sa imbestigasyon sa kapolisan nga ang suspek ni-check-in sa resort bali’g 11 ka adlaw ug ang gipakita niini nga voucher mao ang gipangangkon niini nga gikan sa online booking site.

Diha’ng gi-verify sa sa empleyado sa resort ang online booking company, nibalibad kini ug niingon nga wala nagpa-book ang maong lalaki.

Human niana nitawag dayon og polis ang tagdumala sa resort og polis ug dali nga gidakop ang suspek. Gidala sa police station ang suspek ug gitanggong.

Gipaabot kung mopasaka ba gyud og kaso ang tagdumala sa resort o makigsabot-sabot ba lang sa suspek. (/GMR)    (BANAT NEWS)