CEBU, Philippines – Giangkon ni suspended Mayor Michael Rama nga nakadungog usab siya sa mga tabi-tabi nga ang Malacañang mosuspenso gyud kaniya sa dili pa ang election ban kabahin sa pagpanghatag og tag P20 mil ngadto sa mga opisyal ug kawani sa Cebu City Hall niadtong pasko sa 2013.
Matud ni Rama nga ang gitan-aw gayud karon sa Malacañang mao nga mapiangan siya sa iyang katungdanan atol sa panahon sa pagpangampanya alang sa eleksyon karong Mayo 9, apan iya kini nga kwestyonon kun moabot man ang kamandoan.
Gipasabot ni Rama nga tag P10 mil ra ang iyang girekomendar isip bonus sa mga opisyal ug kawani sa City Hall, apan si Konsehal Sisinio Andales maoy misugyot nga ang kantidad himoong P20 mil.
Kun tag P20 mil ang ipanghatag, ang kinatibuk-ang kantidad nga magasto alang sa suweldo ug allowances sa mga opisyal ug kawani sa City Hall molapas na sa kantidad nga gitugot sa Department of Budget and Management (DBM).
Kini maoy hinungdan nga nahukman nga ang budget adto kuhaon sa pundo nga gigahin unta alang sa pagtabang sa mga biktima sa katalagman ug isipon lang nga calamity financial assistance sa dakbayan ngadto sa iyang mga kawani.
Si Atty. Reymelio Delute nga alyado sa Bando Osmeña Pundok-Kauswagan (BOPK) maoy mipasaka og reklamo batok ni Rama ug ubang opisyal sa dakbayan didto sa Malacañang.
Matud ni Rama nga kun mahukman man gani sa Malacañang nga suspensohon siya sa mao nga paghatag og tag P20 mil nga calamity financial assistance sa mga kawani sa City Hall, kinahanglang apilon sa pagsuspenso ang ubang opisyal, ilabi na si Andales.
Si Konsehal Margarita “Margot” Osmeña nga maoy tsirman sa Committee on Budget and Finance, ingon man si Konsehal Lea Japson wala modawat sa maong calamity assistance.
Pipila ka konsehal sa BOPK nga nakadawat, miuli usab sa ilang tag P20 mil sa paglaom nga sila dili maapil nga masilotan. Ang Commission on Audit (COA) mimando na sa mga kawani sa City Hall nga iuli nila sa kagamhanan ang kantidad nga ilang nadawat. (BANAT NEWS)