CEBU, Philippines – Karong udto, ang imahen ni Señor Santo Niño mobisita sa Cebu City Jail ug moestar kini hangtod ugma sa udto aron paghatag og higayon sa mga binilanggo nga makayukbo kaniya.
Si Jail Superintendent Johnson Calub maoy mangulo sa iyang mga sakop nga mokuha sa imahen ni Santo Niño gikan sa Basilica ug dad-on kini sa prisohan alas 12 karong udto. Matud ni Calub nga ikalima na karon ka tuig nga mobisita ang Santo Niño sa Cebu City Jail male dorm. Gilantaw nga makapausab kini sa batasan sa mga binilanggo.
Pag-abot sa imahen sa City Jail, adunay santos nga misa nga ipahigayon tungod kay nagsaulog man usab ang prisohan sa kapistahan ni Señor Sto. Niño.
Dunay contingent sa mga binilanggo nga mohalad og sayaw nga Sinulog. Ang mga piniriso hatagan og kahigayonan nga makahalok ug makayukbo sa imahen sa balaan nga bata.
Matud ni Calub nga ang mga piniriso maoy usa sa nanginahanglan sa pagbisita ni Señor Santo Niño tungod kay adunay daghan kanila ang nahisalaag, biktima sa sirkumstansya nga dili nila kagustohan.
Kini maoy rason nga ang tagdumala sa City Jail nangita og pamaagi aron malamdagan ang mga piniriso nga dili na mohimo og kadaot ug magbag-o na sa hingpit sa ilang kinabuhi.
Mapasalamaton si Calub ngadto sa kaparian nga Augustino kay gihatagan og kahigayonan ang mga piniriso nga makig-uban sa balaan nga bata pahasubay sa tema “Sto. Niño: Wellspring of Mercy and Compassion.” (/RUB) (BANAT NEWS)