Dugang 90 ka CCTV cameras

CEBU, Philippines - Dugang 90 ka bag-o nga closed-circuit television (CCTV) cameras ang gipamutang sa nagkalainlain nga dapit sa Dakbayan sa Sugbo alang sa mas lapad nga pagmonitor sa mga panghitabo sa dakbayan ilabi na sa seguridad.

Matud ni Cebu City Disaster Risk Reduction Management Council Head Konsehal Dave Tumulak nga namalit sila og dugang CCTV aron pagpalapad sa seguridad sa kadalanan ilabi na sa kadaghan sa mga dagkong kalihokang mahitabo sa siyudad.

Dugang pa ni Tumulak nga ang maong mga ekipo parte sa disaster reduction, prevention ug uban pang kapuslanan diha sa kadalanan ug mamonitor niini lakip ang temperature, huros sa hangin ug uban pa tungod sa dugang sensors nga nakakabit niini.

Ang maong mga CCTV cameras nagkantidad og P28 milyones gikan sa pundo sa City Disaster Fund.

Ang siyudad aduna nay 20 ka mga susamang ekipo nga gimuntar sa nagkadaiyang mga eskina sa dakbayan ilabi na sa mga crime prone areas.

Ang tanang 110 CCTVs mamonitor gikan sa City Command Center (C3) nga nagbase sa Brgy. Mambaling. Ang maong bag-ong Command Center pormal nga mo-operate karong Sabado. (BANAT NEWS)