HPG-7 gitagalan ni Castro

CEBU, Philippines – Gitagalan ni Cebu City Assistant Prosecutor Mary Ann Castro ang Highway Patrol Group-7 og tulo ka adlaw sa pag-uli sa gidagit nga Ford Ranger Wildtrak pick-up nga sakyanan nila sa iyang bana nga si Leodegreco “Greco” Sanchez.

Tipik sa suwat ni Castro ngadto kang Inspector Silvestre Otara Cenia, Jr., hepe sa investigation section sa Regional Highway Patrol Unit (RHPU), nagkanayon nga siya ug ang iyang bana wala gipahibawo sa HPG sa gibuhat sa sakyanan. Giingong ang HPG wala mananghid nga ikustodiya nila kini maong  gusto ni Castro nga ipauli ang sakyanan nga nagtangag sa plakang ABN-7462 kay kun dili kasohan niya sila og carnapping sa HPG.

Niadtong Oktubre ang sakyanan giparking atubangan sa Legislative Building sa Kapitolyo ug gidagit sa wala mailhi’ng carnapper. Ang HPG nagkanayon nga wala pa sila’y suspek sa maong insidente ug padayon pa sila sa ila’ng imbestigasyon.

Niadtong Disyembre 21, ang sakyanan giabandonar sa East Capitol Road, Barangay Camputhaw, Dakbayan sa Sugbo duol sa Bank of the Philippine Islands (BPI) apan dili na  black mica  ang kolor niini kay giilisan na og puti na ang kolor niini. Ang sakyanan gidala sa HPG sa impounding area ug didto na-trace nga iya ni Greco. – /GMR) (BANAT NEWS)