Gitukod nga showroom gipahunong sa DOLE

CEBU, Philippines – Pagsugod pa lang sa 2016, ang Department of Labor and Employment-7 nipahunong sa gitukod nga showroom sa North Reclamation Area, Dakbayan sa Mandaue.

Kalapasan sa Occupational Safety and Health Standards ang nakita sa mga Labor Laws Compliance Officer sa DOLE-7 atol sa ila gihimo’ng pakisusi sa KTM Cebu Showroom Building.

Matud ni DOLE-7 Director Exequiel Sarcauga nga adunay mga trabahante nga nakit-an nga nagtrabaho sa taas nga bahin nga wala’y full body harness nga tataw kaayo nga risgo sa kinabuhi sa mga trabahante.

Pakyas usab sa pagpresentar ang kompanya sa Philippine Contractors Accreditation Board (PCAB) license lakip na ang DOLE-approved Construction Safety and Health Program (CSHP).

Gawas sa wala pagpasul-ob og Personal Protective Equipment (PPE) sama sa hard hat ug face shield, daghan usab nga mga trabahante ang nakit-an nga nagsul-ob lang og tsinelas inay sapatos.

Matud ni Sarcauga nga makapadayon sa ila’ng trabaho ang mga trabahante kung mahatag na sa kompaniya ang tanang gikinahanglan.

Niadtong tuig 2015, ang DOLE-7 naka-issue ug naka-serve og 30 ka work stoppages sa Rehiyon 7. – /GMR) (BANAT NEWS)