CEBU, Philippines – Nagbutang og “One-Stop-Shop” ang kagamhanan sa dakbayan sa Lapu-Lapu aron modawat sa mga aplikasyon niadtong mo-renew ug mokuha’g mga business permit.
Dungan kini sa gihimo usab sa kagamhanan sa dakbayan sa Sugbo nga ang ilang “One Stop Shop” anaa gihimo sa SM Trade Hall.
Matud ni Rolando Duero, secretary to the mayor sa Lapu-Lapu City, nga tumong sa pagbutang og One-Stop-Shop aron maatiman ang tanan sa dili pa ang deadline sa Enero 20.
Gipasabot ni Duero nga kun ang usa ka business establishment adto na mokuha o mo-renew sa ilang business permit sa Enero 21, pahamtangan na kini og multa nga 25 porsiyento ug laing dos porsiyento matag buwan.
Si Felecitas Baguio, assistant city treasurer, miingon nga kay duna man sila’y unom ka assessors, nagpasabot kini nga matag adlaw moabot sa 500 ang ilang mapaubos sa assessment, itandi kaniadto nga anaa lang sa kapin 400.
Midugang usab sila og collector aron dili daghan ang bul-og sa mga tawo nga moadto sa treasurer’s office aron mobayad nga moresulta na hinuon og kaguliyang.
Moabot og kapin 13 mil ka business establishments ang anaa sa dakbayan sa Lapu-Lapu ug 20 porsiyento niini ang mga delinquent kon wala na magbayad sa ilang buhis.
Ang One-Stop-Shop mosugod pagserbisyo alas 8 sa buntag hangtod alas 8 sa gabii, Lunes hangtod sa Biyernes. Gituyo kini aron kadtong mga walay oras sa buntag mahimo nga moadto sa City Hall sa hapon.
Bukas hinuon sila sa adlaw’ng Sabado ug Domingo gikan sa alas 8 sa buntag hangtod alas 5 sa hapon.
Kadtong mga walay business permit apan ang puhonan P50 mil ngadto na sa P100 mil, multahan og P500 samtang kadtong dunay gross P100 mil ngadto sa P500 mil, makamulta og P1,000. – /RUB) (BANAT NEWS)