CEBU, Philippines – Giawhag sa Department of Environment and Natural Resources ang publiko nga motabang sa pagpanalipod sa mga langub.
Kini aron kapanalipdan usab ang mga specialized mineral formations nga gipuy-an sa mga unique nga tanum ug mananap.
Ang DENR-7 Conservation and Development Division nakatala og 224 ka langub sa Central Visayas diin 108 niini ang na-assessed na sa ahensiya.
Sa kinatibuk-an, 25 lang ang na-classified na diin walo ang Class III, 12 ang Class II, ug lima ang Class I.
Labing bag-o nga nadugang sa lista ang Lapus-Lapus Cave sa Barangay Corte, Carmen, Cebu isip Class III nga nagpasabot nga luwas ang langub sa dili pa mga hanas mosulod niini.
Ubang Class III sa Central Visayas ang White Cave sa Minglanilla, Bukilat Cave sa Camotes Island, Mt. Lantoy Cave sa Argao, Cebu; Ka Tikyo Cave sa Mabini ug Nangka Cave sa Trinidad, sa Bohol; Crystal Cave sa Mabinay ug Bacong Cave sa Manjuyod, sa Negros Oriental; ug Cantabob Cave sa Cantabon, Siquijor.
Sa kinatibuk-ang natala sa DENR Central Office, ang Pilipinas adunay 415 nga classified caves nga mao’y gimando sa kagamhanan nga protektahan. – /GMR) (BANAT NEWS)