Libud-suroy sa Subangdaku, Mandaue giatiman
CEBU, Philippines – Mokabat sa 34 ka libud-suroy nga bata sa Barangay Subangdaku, Dakbayan sa Mandaue ang giatiman sa pagpakaon matag adlaw ug gitudloan sa maayo’ng pamatasan.
Si Subangdaku Barangay Kapitan Ernie Manatad nga mao usab ang pangulo sa Liga ng mga Barangay sa dakbayan niingon nga ila’ng giatiman ang mga libud-suroy.
Matud ni Manatad nga nakighiusa sila ni Fr. Carmelo Diola sa Dilaab Foundation.
Gipasabot ni Manatad nga bisan kun may mga ginikanan ang mao’ng mga bata apan daw gipasagdan na lang sila nga matulog sa daplin sa karsada panahon sa gabii.
Edad og 7-anyos ngadto sa 12-anyos ang mga bata nga ila’ng giatiman.
Si Manatad niingon nga naglakip sa matag adlaw nila nga kalihukan ang pagtudlo nga mamahimo sila’ng maayo’ng lungsuranon ug magpakabuhi sa katarung.
Gikan sa nagkalainlaing sitio sa Barangay Subangdaku ang mga bata tungod kay mao kini ang bugtong paagi nga kaminusan usab ang badlungon sa katilingban sa ila’ng paghingkod na sa pangedaron. – /GMR) (BANAT NEWS)
- Latest
