Armas, shabu nasakmit sa Liloan, Consolacion

CEBU, Philippines – Nasakmit sa managlahi’ng operasyon sa kapolisan sa Lungsod sa Liloan ug Consolacion ang mga pinakete’ng shabu ug armas de fuego nga niresulta usab sa pagkasikop sa tulo ka tawo hinungdan sa ila’ng pagkabalhug  sa bilanggoan.

Si Police Officer 3 Jayson Gayo sa Liloan Police Station niila sa duha nga nadakpan nga sila si Ernie Lariosa, 38, taga Sitio Lamac, Barangay Tayud, ug Ogie Apelado, 21, taga Barangay Calero sa mao gihapong lungsod.

Matud ni Gayo nga nakadawat sila og mga taho labot sa nagpadayong ilegal nga kalihukan sa mga suspek sa lugar hinungdan nga gihimo nila ang pipila ka adlaw nga pagpaniid.

Gipangulohan sa hepe nga si Senior Inspector Ramil Morpos ang buy-bust operation ug diha’ng gitunol sa poseur buyer ang shabu ug gidawat usab niini ang bayad, dali kini nila’ng gidakop ang duha ka gikatahapang pusher.

Si Lariosa nasakmitan og tulo ka gagmay nga pakete’ng shabu ug usa ka medium-size nga ang tanan gibanabana nga mokabat sa P30,000 ang kantidad.

Ang kauban sa suspek nga nadakpan nga si Apelado ang nakuhaan usab og mokabat sa P30, 000 nga kantidad sa shabu ug mga drug paraphernalia.

Samtang sa Sitio Bato, Casili, Consolacion, mao’y nadakpan sa kapolisan si Raymond  Quindao Alinsug, 26-anyos, nga nagpuyo sa mao’ng dapit kinsa nakuhaan og kalibre .38 nga armas.

Si Police Officer 1 Socrates Borinaga sa Consolacion Police Station niingon nga gialarma ang suspek hinungdan sa pagkasikop ug gibalhug sa bilanggoan. – /GMR) (BANAT NEWS)