CEBU, Philippines - Hapit nang mapupos ang Year of the Sheep ug mopuli na usab ang Year of the Monkey sa Chinese calendar, ania ang mga angay mahibaw-an karong tuiga.
Ang 2016 ubos kini sa tuig sa Red Fire Monkey base sa Chinese lunar calendar nga magsugod sa Pebrero 8, 2016 ug mao ang ika- 4713th Chinese Year nga mao ang Bing-Shen year sa Chinese Stem-Branch calendar.
Ang Shen konektado kini sa unggoy nga makita sa Chinese horoscope.
Matud pa nga ang mga natawo ubos sa Red Fire Monkey karong ika-20 siglo mao ang mga tuig 2004, 1992, 1980, 1968, 1956, 1944, 1932 ug 1920.
Gipanglantawan sa Chinese Feng Shui nga makapaabot ang katawhan sa 2016 og daghang talagsaon, sadya ug maanindot nga mga panghitabo.
Samtang ubos sa eastern zodiac system, ang unggoy, usa ka metaphysical nga representasyon ug nag-unang patron sa tuig 2016 nga mao usab ang year of humanity.
Ang mga hiyas sa usa ka unggoy marukoy, utokan, makamaong modiskarte, apan makalagot ug kuwang sa pasensya nga matang sa hayop.
Kusog kining mangubi-kubi aron adunay bag-ong madiskubrehan ug gustong makat-onan ug tabian ug mahigalaon.
Mahiligon usab ang mga tawong gipanganak ubos sa Year of the Monkey nga maglaag-laag, pasyonista, ganahan nga adunay bag-ong hagit, ug gusto usab nga mapokus kaniya ang atensyon, ambisyoso apan pirmeng makahimo og kinalit-kalit apan binata nga desisyon.
Ang Agosto, mao ang 2016 Bing-Shen month nga kinahanglan nga bantayan tungod kay adunay mga kinalit-kalit nga panghitabo nga maabot ug naglakip niini ang peligro.
Samtang sa panalapi, kusog kaayong magtigom ang usa ka unggoy ug gusto niini nga anaa kaniya ang tanan.
Sa mga gustong magsugod og bag-ong proyekto niining tuiga, kinahanglang mamili og tarong nga business partner kay makatabang kini nga dili mabug-atan kun mapakyas man ang negosyo.
Ang tuig 2016, grabe ang tensyon sa politika, ang mga konserbatibong gobiyerno ug merkado makasinati usab og mga pagsuway. (BANAT NEWS)