CEBU, Philippines – Patay ang drayber sa usa ka traysikol human nasabak sa katagbo nga delivery van samtang paingon moliko sa Barangay Coro, Lungsod sa Dalaguete pasado alas 5 sa nakalabay nga buntag.
Nabugtoan sa gininhawa ug wala na kaabot sa pagsugat sa Bag-ong Tuig si Fernando Villahermosa Jr., hingkod nga taga Barangay Casay sa mao’ng lungsod. Samtang ang drayber sa delivery van naila nga si Allan Calma, 26, minyo nga taga Upper Talo-ot, Lungsod sa Argao ug drayber sa delivery van sa usa ka kompanya sa tubig.
Matud ni Senior Police Officer 1 Job Sarvida, desk officer sa Dalagute Police Station, nga nahinabi sa Banat News nga ang delivery van paingon unta sa Dakbayan sa Sugbo apan pag-abot sa mao’ng dapit kalit lang nitabok ang traysikol. Gumikan sa kakalit sa hitabo, suway pa unta nga nilikay ang drayber sa delivery van apan nawad-an kini og kontrol hangtud nisampak sa traysikol.
Dali pa unta nga gidala sa Julio Cardinal Rosales Memorial Hospital ang biktima apan gumikan sa grabe’ng angol sa ulo, gideklarar kini sa doktor nga dead on arrival.
Si Sarvida nagkanayon nga sa pagkakaron wala pa nagpakita sa ila’ng buhatan ang pamilya sa namatay samtang kasamtangan nga gitanggong sa selda sa kapolisan ang drayber sa delivery van. – /GMR) (BANAT NEWS)