Bisan mahal, prutas halin

CEBU, Philippines – Gihangop sa mga manindahay og prutas ang kusog nga halin alang sa palihi sa pagsugat sa Bag-ong Tuig hinungdan sa hilabihan sab nga pag-usbaw sa presyo.

Si Rosita Alcaras, 47-anyos, usa sa mga naninda og prutas sa merkado publiko sa Dakbayan sa Mandaue, niingon nga nangompra na sila sa ila’ng suki nga dagku’ng negosyante sa mga prutas sa Carbon Market, Dakbayan sa Sugbo tulo ka adlaw sa dili pa ang pagsugat sa Bag-ong Tuig.

Sagad sa mga prutas nga ila’ng komprahon mao kadto’ng mga lingin tungod kay mao kini ang kusog kaayo ang halin isip palihi sa Bag-ong Tuig.

Kini naglakip sa mansanas, mangga, bayabas, caimito, sunkist, santol, kapayas, buongon, grapes ug uban pa.

Si Alcaras niingon nga bisan niini’ng moderno’ng panahon, daghan gihapon ang nagtuo sa pagpalihi pinaagi sa paghalad og lingin nga mga prutas ug timailhan niini ang kusog kaayo’ng halin hinungdan nga masinati usab ang pag-usbaw sa presyo.

Gitug-an ni Alcaras nga tungod sa mao’ng pagpalihi sa mga tawo pinaagi sa 13 ka lainlaing matang sa prutas, mao’y ila’ng namatikdan nga Disyembre 30 pa lang mahurot na ang kinompra nila bisan sa usbaw sa presyo. – /GMR) (BANAT NEWS)