CEBU, Philippines – Nilanat og sobra sa tunga sa oras ang kahuot sa trapiko human nagkabangga ang usa ka delivery truck ug traysikol sa Barangay Matab-ang, Dakbayan sa Toledo diin duha ka tawo ang naangol sa mao’ng hitabo sa nakalabay’ng adlaw. Giila ang mga naangol nga sila si Emmanuel Honoridez, 63, taga Barangay Uwak, kinsa drayber sa traysikol ug ang backrider niini nga si Garry Hayme, 32, ulitawo, taga Barangay Langub, pulos sakop sa Lungsod sa Asturias.
Samtang ang drayber sa delivery van mao si Genesis Egne, 26, minyo, taga Purok Sto. Rosario, Zone 1, Bacolod City.
Base sa imbestigasyon sa Toledo City Traffic Section nga gikan sa Lungsod sa Balamban ang traysikol nga adunay karga nga ginalon nga tubig.
Samtang ang delivery van gikan sa Toledo City ug adunay karga nga abuno sa usa ka dakong kompaniya sa siyudad ug paingon unta sa Lungsod sa Tabuelan ug patabok sa Bacolod City. Dihang pag-abot sa may gamay nga taytayan, nag-abot ang duha ka sakyanan ug nagkabangga.
Nalumping ug naguba ang manobela sa traysikol ug nalukapa ang drayber nga si Honoridez ug ang backrider nga si Hayme samtang nabuak usab ang wala nga bahin sa suga sa delivery van.
Daling gidala sa Vicente Sotto Memorial Medical Center ang mga biktima tungod sa grabeng samad nga nahiaguman samtang gikustodiya sa kapolisan ang drayber sa van. – /GMR) (BANAT NEWS)