Libre’ng tambal sa high blood, diabetic

CEBU, Philippines - Sugod Enero mahimo na’ng makakuha og libre’ng tambal pang-maintenance sa sakit nga hypertension – high blood ug diabetes-diabetic sa mga Rural Health Units.

Kini ang gipahibawo ni Department of Health (DOH) Secretary  Janette Garin.

Ang mao’ng mga sakit mao’y nag-una sa talaan sa DOH nga sagad anaa sa mga Pinoy tungod sa lifestyle ug inheritance.

Giaghat ni Garin ang mga nag-antus sa mao’ng sakit nga magpamiyembro sa DOH’s Hypertension and Diabetic Club aron malista kini ug makuha ang mga tambal nga gikinahanglan sa ila’ng maintenance.

Gikinahanglan nga adunay lista aron mao’y basehan sa milligram sa tambal nga pangayuon sanglit magdepende ang dosage sa timbang ug edad sa pasyente ug ma-check-up usab sa doktor sa RHU ang mga pasyente ug magiyahan sa insakto’ng pagkaon ug lifestyle nga mao’y hinungdan sa pagtumaw sa mao’ng mga sakit.

Matud ni Garin nga tuyo niini nga maseguro nga regular nga masusi ang mga pasyente nga nag-antus sa mao’ng sakit aron malikayan ang paggrabe niini ngadto na sa pagkadisgrasya.

Nalakip sa “high risk” nga kaso sa matang sa sakit ang diabetes ug high blood nga sagad mao’y sakit sa mga Pinoy.

Ang mga RHUs mao’y magpadala sa kompleto’ng listahan sa mga pasyente’ng magpalista sa DOH sa ila’ng lugar aron mabanabana ang mga tambal nga gikinahanglan nga ipadala sa matag RHU sa tibuok nasud.

Giklaro ni Garin nga ang high blood usa ka traydor nga sakit nga dili matagna kanus-a moatake ug mo-complicate usab kini sa sakit nga diabetes.

Nasayran nga ang normal blood pressure sa tawo mao ang 120 over 80 samtang sa kaso sa diabetes 60-100 blood sugar count. (BANAT NEWS)