P15mil nga shabu nakuha sa lola

CEBU, Philippines - Mag Bag-ong Tuig sulod sa prisohan ang usa ka 73-anyos nga lola human kini nadakpan sa buy-bust operation ug ang shabu nakuha diha sud sa iyang  underwear.

Ang operasyon gihimo diha sa Sitio Lower Suran, Barangay Quiot ning dakbayan sa Sugbo pasado alas 11 kagahapon sa buntag.

Ang dinakpan giila nga si Lilia Sable, residente sa maong dapit nga giila nga usa ka level 3 drug pusher.

Ang hepe sa City Intelligence Branch (CIB) sa Cebu City Police Office, Superintendent Romeo Santander nga nahinabi sa Banat News nagkanayon nga halos usa ka buwan nilang gipanid-an ang ilegal nga kalihokan ni Sable  human sila nakadawat og impormasyon nga  namaligya kini og shabu.

Sumala pa ni Santander dili sila makatuo nga sa edad sa subject namaligya kini og shabu ug ilaha usab nasuta gikan sa ilang asset nga sa bilahan niini tagoan ang mga drugas ug ayha lang kuhaon kun dunay mopalit. Kagahapon sa buntag nakakita og higayon ang CIB  paglusad sa operasyon human napalitan og usa ka paketeng shabu sa asset ang suspek. Si Santander mipasabot nga babaye nga polis nga maoy mirekisa niini hangtod nga nakuha ang 22 ka gagmay nga pakete sa shabu ilawom sa panty nga mikantidad og P15 mil.

Sa pagbanabana ni Santander, si Sable na ang pinakatiguwang nga ilang nadakpan sa ilang ginahimo nga operasyon kontra drugas.

Sa inisyal nga paghinabi ni Santander sa suspek kini miangkon sa salaod kay maoy iyang kuhaan panggastos sa ilang balay human nagkasakit ang iyang bana. (BANAT NEWS)