CEBU, Philippines – Labing unang high-tech nga operating room sa Sugbo ug Integrated Emergency Room mapahimuslan na sa mga Sugboanon nga malandig sa Cebu City Medical Center sa unang kwarter sunod tuig.
Kini ang gibutyag ni Atty. Rey Chris Panugaling, Chief of Hospital for Administration, nga nahinabi sa Banat News, matud niya madugang kini sa pipila na ka mga gipalambo nga serbisyo karon sa CCMC.
Una nang gibutangan og air-conditioning units ang pediatric wards ngadto na sa ubang lawak niini ug adunay 39 ka mga bag-ong napalit nga higdaanan nga anaay lamesa sa kilid.
Gipadayag usab ni Panugaling, sa unang kwarter sa 2016 magamit na ang high tech nga operating room nga gigastohan og P19 milyones alang sa pagpalit sa maong ekipo.
Giklaro usab niya nga walay pasyenteng modangop sa CCMC nga ilang balibaran, bisan ug dili kini molupyo sa Dakbayan, tungod kay ang tambalanan para sa tanang mga tawo nga moduol niini.
Gipahibalo usab ni Panugaling nga miabot na sa kapin sa P100 milyones gikan sa Enero hangtod niining buwan sa Disyembre mas taas sa P60 milyones sa ilang target nga matigom.
Hinuon iyang giklaro nga dili kini bayad sa mga pasyente kondili naggikan kini sa PhilHealth human sila nipa-enroll sa mga kabus nga pasyente ngadto sa Point of Care ug No Balance Billing. (BANAT NEWS)