Walay korum sa special session?

CEBU, Philippines – Napanglantawan nga walay special session nga mapahigayon ang Cebu City Council karong Martes, Disyembre 29, tungod kay daghang mga konsehal dili na makatambong tungod kay naglulinghayaw na kini sa lagyo nga mga lugar.

Sanglit ang Cebu City Council gilangkoban man og 18 ka konsehal, kinahanglan nga adunay 10 nga motambong sa sesyon usa kini makakuha og korum. Ang balaod naglatid nga ang mga isyu nga matuki dili isipon nga balido kun walay korum sa mga sakop sa konseho. Si Acting Cebu City Mayor Edgardo Labella mipadala og suwat sa tanang mga konsehal sa wala pa ang Pasko ug naghangyo nga unta ang City Council magpahigayon sila og special session karong Martes aron tukion nila ang Supplemental Budget No. 1.

Gusto ni Labella nga aprobahan na unta sa City Council ang P2.8 Bilyones nga Supplemental Budget No. 1 aron kabayran na ang P2.4 Bilyones nga nahabiling utang sa dakbayan sa Sugbo didto sa Japan nga gigamit sa pagmugna sa South Reclamation Project karon gitawag na og South Road Properties (SRP). Apil sa SB-1 mao ang gahin alang sa paghatag og Productivity Enhancement Incentive (PEI) kon bonus sa matag kawani nga regular ug kaswal sa City Hall. Ang kantidad nga ihatag katumbas sa usa ka buwan nila nga sweldo.

Matud ni Konsehal Margarita Osmeña, tsirman sa Committee on Budget and Finance, nga daghan sa mga konsehal ang nakahinayak na sa ilang pagbiyahe kay uwahi na nga nadawat nila ang suwat ni Labella. (BANAT NEWS)