Bayad sa business tax adto sa SM

CEBU, Philippines – Ang mga tagdumala og balay-patigayon dinhi sa dakbayan sa Sugbo hatagan og lugway sa pagbayad nila sa ilang business tax nga dili makabayad og multa.

Si Cebu City Treasurer Diwa Cuevas mirekomendar ngadto sa Cebu City Council nga imbes kutob ra sa Enero 20 ang pagdawat og business tax nga walay multa, lugwayan kini ngadto na sa Enero 27.

Gipasabot ni Cuevas nga sa nangaging katuigan bisan og napupos na ang gitagal sa balaod sa pagbayad og buhis nga walay multa, daghan pa kaayong magbubuhis nga mohangyo nga dili lang sila pabayron og multa.     

Base sa Local Government Code (LGC) ang mga tagdumala og balay patigayon gihatagan lang og higayon nga mobayad sa ilang business tax hangtod sa Enero 20 nga dili sila pahamtangan og multa.

Matud ni Cuevas nga kadtong mobayad og business tax nga lapas sa Enero 20, patungan na sila og kuwatro porsiyento nga multa base sa kantidad nga ilang bayranan, ug dos porsiyento nga interest matag buwan kun dugay pa gyud sila nga mobayad.

Gipasabot ni Cuevas nga daghan kaayo nga holiday sa Enero, ingon man ang kalihukan sa Sinulog, mao nga angay gayud nga hatagan og lugway ang mga magbubuhis.

Karong tuiga, ang City Treasurer’s Office (CTO) nagpaabot nga makakolekta sila og P1.5 bilyones gikan lang sa business tax sa tuig 2016 kay karong tuiga nakakolekta sila og P1 ka bilyon. (BANAT NEWS)

Show comments