Butane/LPG canisters wad-on sab sa Lapu-Lapu?

CEBU, Philippines – Adunay lakang ang pipila ka opisyal sa dakbayan sa Lapu-Lapu nga did-an na usab ang pag-refill, pagpamaligya ug ang paggamit og Butane/LPG canisters didto sa ilang lugar.

Sila si Konsehal Alexander Gestopa Jr. ug Eduardo Patalingjug misugyot nga likayan na ang paggamit og Butane/LPG canisters tungod kay makahatag kini og peligro sa sunog.

Tungod niini, ang konseho sa dakbayan sa Lapu-Lapu mopahigayon og public hearing karong Disyembre 29, sa alas nuybe sa buntag, adto sa session hall aron mahisgotan pag-ayo kining maong gisugyot nga ordinansa.

Ang mga tawo nga apektado unya kun ipatuman kining mao nga ordinansa gidapit nga motambong sa public hearing aron sila makapadayag sa ilang mga huna-huna ug baruganan kabahin sa mao nga isyu. Gani bisan kadtong mga ordinaryo nga lumolupyo nga tiggamitan og Butane/LPG mini-cylinders gidapit nga motambong ug apil nga mopadayag sa ilang mga sentimento kun uyon o supak ba sila sa gisugyot nga ordinansa.

Usa ka opisyal sa Cebu Budget LPGas Association, Incorporated, kahugpongan sa mga tig-refill og LPG ngadto sa mga mini-cylinders, miingon nga motambong sila sa public hearing.

Ang statistics sa kahugpongan nagpakita nga kaliboan ka pamilya sa Sugbo nahimo na nga suki sa ilang produkto kay napamatud-an nila nga nindot pa nga gamiton ang mini canisters kay sa pagluto gamit ang kahoy. Si Emily Parcon, taga Barangay Lahug, misaysay nga kaniadto mogamit siya og kahoy para sugnod sa pagluto sa ilang pagkaon apan karon migamit na siya og stove nga gigamitan og Butane/LPG cylinders.

Matud ni Parcon nga sa P13 nga kantidad sa usa ka mini cylinder sa Butane/LPG mas makadaginot pa siya kay sa mogamit siya og kahoy sa pagluto.

Gitan-aw sa uban nga ang lakang sa mga opisyal sa Lapu-Lapu, ug apil na dinhi sa dakbayan sa Sugbo ug Mandaue, nga idili ang paggamit sa Butane/LPG mini stove, makapasuko ra hinuon sa katawhan.

Ang kadagkoan sa Bureau of Fire Protection (BFP) mitataw nga wala pa sila’y statistics nga may mga sunog nga nagumikan sa Butane/LPG canister. (BANAT NEWS)