CEBU, Philippines – Ang mga konsehal nga alyado sa Bando Osmeña Pundok-Kauswagan (BOPK) gibati og dakong kahibulong kun ngano nga gipasagdan ra sa kadagkoan sa Police Coordinating Advisory Council (PCAC) ang nagpadayon nga masiao swertres dinhi sa dakbayan sa Sugbo. Ang gitudlo nga pangulo sa PCAC nga si Engr. Eugene Elizalde ug si Acting Cebu City Mayor Edgardo Labella maoy nangulo sa pagpangguba sa mga nasakmit nga video karera, moli-moli ug sa mga naimbargo nga mga law-ay’ng basahon.
Matud sa mga konsehal nga alyado sa BOPK nga nakabantay sila nga sila si Labella ug Elizalde mitug-an sa mga reporters nga hugtan nila ang kampanya batok sa video karera ug moli-moli apan makapahibulong ngano nga wala sila’y timik kabahin sa masiao swertres. Kaniadto giangkon ni Mayor Michael Rama nga adunay mga tawo nga miduol kaniya ug mikumbinsir unta nga tugotan sila nga maka-operate og masiao swertres sa dakbayan, apan sila gibalibaran sa mayor. Adunay report nga samtang mibalibad ang mayor, adunay usa ka opisyal sa City Hall nga maoy mipasalig nga dili mahilabtan ang masiao swertres kun kini mo-operate apan ubos sa kondisyon. Ubos sa Republic Act 8551, ang kampanya pagsumpo sa ilegal nga sugal, gitahas kini ngadto sa mga mayor. (BANAT NEWS)