CEBU, Philippines – Nangaangol ang usa ka inahan ug anak niini human ang yuta nga gitukuran sa ilang balay ang nilihok ug nidahili paubos diha sa Sitio Riverside, Barangay Calajoan, lungsod sa Minglanilla.
Ang mga biktima giila nga sila si Gaudiosa Flores ug ang iyang anak nga si Cherylyn, 14 anyos, silang duha nakaangkon og mga ginagmay nga samad-samad sa ilang kalawasan tungod sa hitabo.
Matud pa ni PO3 Vincent Aliñabo sa Minglanilla Police Station nga si Flores ug ang iyang bana nga si Sergio lakip na ang ilang tulo ka mga anak ang hinanok og katulog sa dihang ilang nabantayan nga ang ilang payag daw nag-irog ug sa ilang pagsusi nag-akbo na sila sa kilid sa sapa.
Si Flores ug ang iyang bana hasta iyang mga anak nanagan pagawas apan nasamdan si Flores ug iyang anak nga si Cherylyn sa ilang pagdali-dali sa paggawas.
Dali silang gitabang sa mga sakop sa Minglanilla Disaster Risk Reduction and Management Council. Si Aliñabo nagkanayon nga ang yuta sa nahisgutang lugar ang nihumok tungod sa sagunson nga pag-uwan dala sa bagyong Nona ug Onyok niadtong miaging semana.
Gumikan sa panghitabo, si Mayor Elanito Peña nagplano nga pabalhinon ang mga residente nga nanimuyo duol sa sapa sa mas luwas nga lugar. – /EIM) (BANAT NEWS)