CEBU, Philippines - Mga transport group gusto nga adunay himuong pagtuon kun tinuod ba nga dako sila og kontribusyon sa polusyon tungod sa mga karaang jeep pasaheroan.
Mao kini ilang gipaabot atol sa gipahigayong dialogue tali sa ilang grupo ug sa Land Transportation Franchising and Regulatory Board (LTFRB).
Buot nilang adunay moratorium aron dili iimplimentar ang kamandoan nga dili na padaganon ang mga lapas na og 15 ka tuig nga public utility jeepneys (PUJs).
Tulo ka transport leaders ang mitambong sa dialogue uban kang LTFRB - 7 Regional Director Reynaldo Elnar bahin sa ilang pagsupak sa kamandoan sa Department of Transportation and Communications.
Ang Alliance of Transportation Organization Member Intra Cebu (ATOMIC), PISTON, NCTO gustong adunay pagtuon nga himuon ang uban sa mga ahensya sa gobiyerno pagsusi unsa kadako ang kadaot sa kalikopan nga epekto sa pagpadagan sa mga karaang sakyanan. Karong bulan sa Enero gikatakdang i-phase out na ang mga kagang-kagang nga mga sakyanan. (BANAT NEWS)