CEBU, Philippines - Nagsusi na sa kaso ang kanhi kauban ni Talisay City Mayor Johnny de los Reyes nga nilansar sa niagi’ng eleksyon.
Si Loreto Bonete personal nga nitunol sa iya’ng suwat kang Deputy Ombudsman-Visayas Paul Elmer Clemente aron kumustahon ang kaso’ng graft and corruption nga gipasaka batok sa mayor ug anak nga si City Administrator John Yre de los Reyes.
Kini may kalabutan sa pagpalit og rescue vehicle nga gihulagway sa Commission on Audit (COA) nga overpriced ug mahal kung itandi sa branded nga sakyanan.
Matud ni Bonete nga nilabay na ang kapin usa ka tuig apan wala pa siya’y balita sa pag-irog sa kaso. Asoy niya nga sa paglingkod ni Clemente siya nipasalig nga ang iya’ng kampanya sa iya’ng administrasyon mao ang transparency ug dali-on ang pagresolbar sa mga kaso.
Niadto’ng Nobiyembre 25 sa niagi’ng tuig, nipasaka og kaso si Bonete batok ni JVR ug sa anak nga chairman sa Bids and Awards Committee. Nihulagway ang mayor nga klaro’ng pamolitika ang kaso nga gipasaka ni Bonete batok kaniya sanglit wala gilakip ang ubang sakop sa BAC. Ang abogado ni Bonete nga si Atty. Rene Abcede niingon nga dili makadiktar ang mayor kun si kinsa ang gusto’ng pasakaan og kaso ni Bonete.
Si Mayor JVR ug iya’ng anak ang una na’ng gipasakaan og laing kaso ni Jun Cabrera tungod gihapon sa giingong anomaloso’ng pagkuha sa serbisyo sa Black Pearl Security Agency ug naalkansi ang siyudad og minilyon ka pesos.
Ang kampo sa mayor ang nanghimakak sa mao’ng pasangil. (BANAT NEWS)