Dakong inhustisya ang kapobrehon-de Lima

CEBU, Philippines - Si kanhi Department of Justice (DOJ) secretary, Leila de Lima kinsa magpapiling senador sa sunod tuig nga eleksiyon miingon nga ang kapobrehon maoy dakong inhustisya nga nasinati karon sa mga Pilipino.

Si de Lima kinsa mibisita kagahapon sa hapon sa buhatan sa The Freeman ug Banat News nagkanayon nga way nasud nga walay problema sa kapobrehon ug kurapsyon.

Matud pa niya, anha lang magkadeperensya sa gravity ug magnitude sa kakabus sa matag nasud.

Sumala pa niya, kun mapakunhod ang kurapsyon sa nasud ug mahatagan og edukasyon kadtong mga nag-ilaid sa kakabus, mokunhod usab niini ang gidaghanon sa mga naglisod.

Plano niyang makabaton og libreng edukasyon ang anak sa mga mag-uuma   tungod kay matud niya, sagad sa mga anak karon sa mga mag-uuma wa nay gusto nga manguma.

Buot niya nga adunay mga programa nga buhaton alang sa maong mga kabataan nga konektado gihapon sa agriculture sector sama sa pagmugna og mga produkto gikan sa abot sa ilang mga umahan.

Laing paagi ni de Lima nga masolusyonan ang problema pinaagi usab sa pagpaubos sa gikinahanglang puhonan o gastos sa mga mag-uuma samtang mapatas-an ang presyo sa ilang produkto.

Sumala pa ni de Lima, ang sektor sa panguma nga maoy hago kaayo sa pagtrabaho aron adunay abundang pagkaon ang nasud mao karon ang anaa sa kinapobrehan nga hut-ong sa mga Pilipino.

Sa laing bahin, giangkon ni de Lima nga usa ang mga Cebuano sa gustong makuha sa mga kandidato panahon sa piniliay.

Giangkon ni de Lima nga kaniadto may pagduhaduha siya kun makakuha ba siya og boto gikan sa mga Sugboanon ilabi na nga bagito pa siya sa politika, si de Lima usa ka human rights advocate.

Lain hinungdan sa iyang pagduhaduha mao nga siya kaalyado sa Liberal Party (LP) ug usa siya sa mga milihok sa mga kaso batok kang kanhi presidente Gloria Macapagal Arroyo nga popular kaayo kaniadto sa mga Sugboanon.

Apan dako ang iyang pagsalig nga ang iyang abilidad ug baruganan nga ipatigbabaw unsay husto ug dili ang sayop maoy iyang bentaha sa uban aron makuha ang pagsalig sa mga Sugbuanon.

Nagtuo si de Lima nga di solusyon ang paggamit og pwersa o bayolenteng pamaagi hangtud nga dili pa masuwayan ang ubang mga pamaagi sama sa reformative ug rehabilitative approach inay nga punitive ug labaw na ang extra-judicial killings alang sa mga nakalapas sa balaod.

Sukad nga nagsige na siya og duaw sa Sugbo ug nakigkita sa mga nagkalain-laing grupo sa mga Sugboanon, nabantayan niya ang kamainiton sa paghangop kaniya sa mga tawo gikan sa kinaubsan ngadto sa kinatas-an nga hut-ong sa katilingban ug malaumon siya nga ila siyang suportahan. (BANAT NEWS)