Puya gibilin sa CR

CEBU, Philippines - Napalgan ang usa ka puya nga gibanabana nga anaa sa upat ngadto sa lima ka buwan nga gibilin lang sulod sa pansayan sa Sitio Panaghiusa, Barangay Duljo-Fatima, Dakbayan sa Sugbo.

Usa ka Edna Abarquez, 32, nagpuyo sa mao’ng lugar ang ni-report sa Duljo–Fatima Barangay Hall human niya nakit-i ang patay na nga puya samtang padulong siya mangihi sa pansayan.

Diha’ng gisusi sa kapolisan ug Cebu City Emergency Medical Service (CCEMS), ang puya wala na’y kinabuhi.

Gidala ang patay’ng puya sa St. Francis Funeral Homes alang sa tarong nga paghipos samtang ang kapolisan ang padayon nga nagsusi sa responsable niini. (BANAT NEWS)