Traffic sa Minglanilla moving na

CEBU, Philippines - Giklaro ni Minglanilla Mayor Elanito Peña nga wala’y kamatuoran ang pasangil sa kanhi mayor nga ang iyang administrasyon haguka sa pagsulbad sa traffic sa ila’ng lugar.

Matud ni Peña nga seguro sa kadugay nang panahon nga si Alex Cañares ang nawala sa ilang lungsod tungod sa paglarga sa gawas sa nasud wala na kini nahibawo kun unsa ang ilang nabuhat aron lang sa pagpalapad sa karsada.

“Wa lang gani ko mag-ingon nga sa una sa iyang panahon hapit ko madisgrasya tungod sa kabati sa karsada,” asoy ni Peña.

Samtang si Municipal Administrator Concordio Mejias nagkanayon nga ang administrasyon ni Peña nagsugod na sa pagpalapad sa kadalanan sama sa Barangay Calajoan ug ang mosunod nga proyekto mao ang pag-expropriate na unya sa mga yuta.

Si Cañares kinsa magpapili sa pagka-mayor nisaway sa administrasyon ni Peña nga wala’y nabuhat sa grabe’ng traffic sa lungsod ug ang paghimo og reclamation nga wala gani nipalapad daan sa mga karsada.

Matud ni Mejias nga ang pagplano pa lang sa reclamation ila nang giapilan ang paghimo og mga dagku nga karsada ug dili angay nga mosaway dayon si Cañares. Si Mejias nagkanayon nga mo-boomerang lang ni Cañares ang iyang pasiatab nga traffic ang Minglanilla tungod kay moving na karon ang mga sakyanan nunot sa paghuman na sa proyekto sa Department of Public Works and Highways sa pagpalapad sa karsada.

Gihimakak usab ni Peña ang pamahayag ni Cañares nga siya nihatag og sugyot kun unsaon pagpalambo sa ilang karsada.

“Niingon ra gyud na siya nako nga Dong atimana ang karsada pero wa gyud na siya’y gisulti kun unsaon pag-atiman,” dugang ni Peña. (BANAT NEWS)