CEBU, Philippines - Dili kaalyado sa politika ang kasamtangang duha ka tag-as nga opisyal sa Dakbayan sa Sugbo apan sila nipasalig nga magtinabangay samtang gisuspenso si Mayor Michael Rama
Si Konsehal Nestor Archival pormal nga nilingkod isip acting vice mayor ug nanumpa atubangan sa mga konsehal atol sa sesyon kagahapon.
Ang mga konsehal nibisita usab sa buhatan ni acting Mayor Edgardo Labella, kinsa kaalyado ni Rama.
Apan matud ni Labella nga ang courtesy call sa mga konsehal simbolo sa “friendship” bisan dili sila ka alyado.
Nasabutan usab ni Labella ug Archival nga magtinabangay sa mga kalihukan.
Si Labella ug Archival mag-atbang sa pagka-bise mayor sa umaabot eleksiyon.
Awhag ni Archival sa konseho ug mga kawani sa legislative department nga siya suportahan sa iya’ng mga plano.
Pipila ka kausaban nga gipatuman ni Archival ang pagdaginot sa kuryente ug tubig aron minus ang mabayran.
Buot usab ni Archival nga mahimoan og lakang ang huot sa trapiko, pagpaluag sa prisohan ug pagpalambo sa mga pasilidad. Apil niini ang pagtagad sa mga biktima sa demolisyon sa dakbayan. (BANAT NEWS)