CEBU, Philippines - Gibalik isip jail warden sa Cebu City Jail si J/Supt. Johnson Calub hulip kang J/Supt. Jessie Calumpang.
Kagahapon sa buntag ni-courtesy call si Calub kang acting Mayor Edgardo Labella human siya gibalik gikan sa Lapu-Lapu City Jail base sa kamanduan sa labaw’ng buhatan sa Bureau of Jail Management and Penology.
Atol sa pagbisita ni Calub sa buhatan ni Labella, ila’ng gituki ang paghatag og sulbad sa nagsobra’ng gidaghanon sa mga piniriso nga niabot na sa 2,666 samtang ubos sa 1,000 ra unta ang kapasidad niini.
Dugang ni Calub nga problema gyud ang gidaghanon sa mga priso apan sa iya’ng pagbalik sugdan na usab nila ni Labella ang proyekto sa pagpaminus sa gidaghanon sa mga priso sa sulod sa Cebu City Jail.
Si Labella sa iya’ng bahin nibutyag nga malipayon siya sa pagbalik ni Calub ug ipatuman na nila ang naoktaba nga decongestion program.
Usa niini ang paggamit sa mga binilanggo nga adunay kaalam sa balaud isip para-legal diin sila ang mosusi sa mga kaso sa ila’ng isigka-priso ug mohimo og rekomendasyon.
Gibutyag ni Labella nga nakapahigayon na sila og seminar kuyog ang mga abogado sa BJMP ug sa kagamhanan sa siyudad aron matabangan nga maminusan ang mga priso nga dugay niirog ang kaso. (BANAT NEWS)