CEBU, Philippines - Nadakpan sa mga opisyal sa barangay sa Jaclupan, Dakbayan sa Talisay ang usa ka tigpayuhot og ilegal nga drugas kagahapon sa hapon.
Ang nasikop nailhan nga si Aldrin Bonghanoy, 31-anyos, minyo nga taga Sitio Dike sa mao’ng barangay.
Si Kapitan Joel Orbiso sa interbyu sa Banat News nipahibawo nga si Bonghanoy ang notado na sa pagpamaligya og ginadili’ng drugas sa ila’ng barangay ug daghan na ang reklamo gikan sa mga ginikanan.
Niadto’ng Lunes sa hapon, asoy ni Orbiso nga niuli na siya sa ila’ng panimaye ug siya gitawgan gumikan sa presensya sa suspek.
Matud ni Orbiso nga kuyog sa mga tanod nga sila si Wilfredo Adan ug Rizalde Cabaluna, ila’ng giadto ang lugar diin ila’ng nakita ang suspek sa kapilya nga gidudahan nga naghuwat og kustomer.
Gisita si Bonghanoy ug giimbitar sa barangay hall ug didto ila’ng nakuhaan og 20 ka gagmay nga pakete sa shabu ug walo ka tinfoil nga wala pa magamit. Si Orbiso niasoy nga ang suspek ang nipasabot kanila nga ang iya’ng gibuhat mao lang ang ginagmay nga negosyo.
Apan bisan pa man niini si Orbiso niingon nga ilegal ang negosyo ni Bonghanoy hinungdan nga gidala siya sa Talisay City Police Station ug gipasakaan og kaso.
Sigun pa niya nga dili siya makatugot nga adunay mga tawo nga mohimo og ilegal nga negosyo sa ila’ng lugar tungod kay ang kaugmaon sa kabataan o sa tanan ang maguba sa mao’ng ilegal nga drugas. (BANAT NEWS)