May kasong rape gitusak og bala

CEBU, Philippines - Natusak sa bala ang lawas sa usa ka lalaki nga adunay pending nga warrant of arrest  sa kasong pagpanglugos human siya gitabangan og gukod ug gipusil sa duha ka mga lalaki diha sa Barangay Agbalanga sa Lungsod sa Moalboal sa nakalabay nga hapon.

Ang gipusil patay giila nga si Reynaldo Asister, taga Barangay Busay, Moalboal kinsa sumala pang Police Officer 2 Peter Paul Tangpos, desk officer sa Moalboal Police nga nahinabi sa Banat News adunay warrant of arrest didto sa Bohol.

Matud pa ni Tangpos, pipila ka bulan na ang nakalabay ang kapulisan sa Carmen, Bohol mitawag sa ilang buhatan ug nagpahibalo nga ilang gipangita si Asister kay kini duna’y kaso’ng rape sa korte sa Dakbayan sa Tagbilaran.

Si Tangpos miingon nga ang ilang mga kauban sulay usab dayon nga nangita sa suspetsado apan wala nila kini makit-i, ila hinuong nasayran nga adunay daghang mga Asister sa ilang lungsod.

Niadtong nakalabay nga hapon samtang nagbarog-barog daplin sa dalan ang biktima kalit kini nga giduol sa duha ka mga lalaki apan nakabantay ug mikaratil og dagan sa kamaisan apan gigukod  ug gipaulanan kini og bala.

Samad pinusilan sa ulo, dughan ug kilid sa lawas ang naangkon ni Asister nga sulay pa unta nga gidala sa Badian District Hospital apan gideklara kini nga dead on arrival.

Si Tangpos miingon nga wala pa sila makasiguro kun may kalambigitan sa kasong rape ang motibo sa pagpatay sa biktima. (Jojo C. Ugdol/EIM)(BANAT NEWS)