CEBU, Philippines - Magsaulog sab sa Pasko ang 1,231 ka binilanggo sa Mandaue City Jail.
Matud ni Jail Officer 2 Johnatan Medina, inmates welfare officer, nga naglakip sa kalihukan ang indigay sa Christmas décor sa matag selda. Ang Christmas décor ginama sa indigenous materials gawas sa series light tungod kay kuyaw man kini sa sunog. Dugang ni Medina nga si Mandaue City Jail Warden Chief Inspector Gil Inopia nag-andam usab og ganti sa mahimo nga mananaug.
Gihatagan usab nila og kahigayunan nga ang mga binilanggo nga mohimo sa ila’ng pagpanaygon ngadto sa mga bisita ug lakip na usab sa ila’ng buhatan ug gigahin usab nila ang Disyembre 24 ngadto sa 25 sa pagbisita sa ila’ng mga sakop sa pamilya.
Si Medina niingon nga ang matag selda ila’ng gitugutan nga magpasiugda sa ilang kaugalingong Christmas Party. (Romeo T. Limpangog/GMR)(BANAT NEWS)