Pabuto gawas sa fire cracker zone dakpon

CEBU, Philippines - Sakmiton sa kapolisan ang mga pabuto nga makit-an nga ibaligya gawas sa fire cracker zone sa South Road Properties (SRP) sa Dakbayan sa Sugbo.

Matud ni Senior Supt. Marciano Batiancela, officer-in-charge sa Cebu City Police Office, nga kini base sa ordinansa sa dakbayan nga naggahin og lugar diin pwede makabaligya og pabuto ang mga manindahay.

Apan gipasabot ni Batiancela nga ang kapolisan igo lang mosuporta sanglit ang mangulo mao ang Bureau of Fire Protection kay sila man ang aduna’y kompleto’ng listahan sa mga negosyante og pabuto nga aduna’y lisensya.

Ang mao’ng isyu nahisgutan na sa tigum sa Police Advisory Coordinating Council sa Cebu City Hall nga dakpon kadto’ng ilegal nga namaligya.

Sa habig ni Cebu City Fire Marshall Rogelio Bongabong kini niingon nga andam ang iya’ng buhatan nga mohimo sa tahas uban sa tabang sa kapolisan. Si Bongabong nipasabot nga gitugutan nila nga mabaligya sa mga malls ang mga fireworks apan dili ang mga fire crackers.

Hinuon gipanawagan ni Bongabong ang publiko nga likayan lang ang pagpabuto sa mga fire crackers karong Pasko ug Bag-ong Tuig aron dili madisgrasya, mabuthan ug dili malista nga mamahimo’ng biktima sa pabuto.  (BANAT NEWS)