Truck ban sa Minglanilla gitun-an

CEBU, Philippines - Gitun-an karon sa kapulisan sa lungsod sa Minglanilla ang pagpatuman og truck ban ingon man ang pagdili sa mga traysikol nga makasulod sa national highway aron maiban-ibanan ang dagan sa trapiko sa maong lungsod.

Si Chief Inspector Franco Oriol, hepe sa kapulisan sa lungsod sa Minglanilla miingon nga manginlabot na sila sa maong problema gumikan sa grabeng pagsaway nga ilang nadawat.

Iyang gihulagway nga ginganlan na ang lungsod sa Minglanilla nga "traffic capital of the south."

Matud pa ni Oriol nga aduna siyay girekomendar sa konseho nga mopatuman og truck ban ug ingon man did-an ang mga traysikol sa pagsulod diha sa highway. Gani ipatuman sab nila ang no left turns sa mga u-turn slots. "Dili kay bisan asa na lang dapit moliko og u-turn kay makadugang man ni sa traffic," matud pa ni Oriol. Asoy pa niya nga unta ilang mapatuman ang maong polisiya sa dili pa ang Misa de Gallo tungod kay hapit na man nila magamit ang mga traffic lights.

Gibutyag ni Oriol nga aduna karon silay gihimong Traffic Code aron maklaro nga ang mga sakop sa Minglanilla Traffic Commission ubos na sa superbisyon sa kapulisan.

Sigun pa niya nga iya dayung ipaubos sa training ang mga sakop kalabot sa pagsabot sa lagda sa trapiko ug ang hustong pag-implimentar niini.

Ang kapulisan sa lungsod sa Minglanilla ang nagpaabot pa sa tubag sa lokal nga opisyal pinanguluhan ni Mayor Elanito Peña kabahin sa maong plano. (BANAT NEWS)