Rama suspendido

CEBU, Philippines - Gikatakda’ng  ipatuman karong adlawa sa Department of Interior and Local Government ang suspension order batok ni Cebu City Mayor Michael Rama.

Si Rama gipahamtangan sa Malacañang og duha ka buwan nga pagka-suspenso sa kaso’ng administratiba nga gisang-at ni Labangon Barangay Kapitan Victor Buendia.

Apan matud pa ni Bise Mayor Edgardo Labella kinsa mao’y acting mayor ug kaalyado ni Rama nga usa sa ila’ng option ang pagduso og motion for reconsideration.Si Rama atoa pa sa nasud sa France alang sa Climate Change Summit ug gikatakda nga maabot karong adlawa.

Mayo sa nakalabay’ng tuig gipasakaan og kaso ni Buendia ang mayor gumikan sa pagpaguba sa proyekto sa barangay nga center island sa karsada.

Gihangop ni Buendia ang suspension order tungod kay naigo kini sa matuwid na daan ni Presidente Benigno Aquino III.

Sumala pa ni Buendia nga klaro kaayo nga pag-usik-usik sa kwarta sa magbubuhis ang gihimo ni Rama sa pagguba sa iya’ng proyekto.

Panghinaut ni Buendia nga dawaton ni Rama ang order sa Presidente.

Gibutyag ni Buendia nga wala pa hinuon niya nadawat ang suspension order ni Rama apan malaumon siya nga maghatag kini og leksiyon sa mayor nga dili makalimot sa iya’ng mandato sa katawhan.

Gipadayag ni Buendia nga kung siya’y pabut-on, dili lang duha ka buwan nga suspension ang angayan dawaton ni Rama kung dili kinahanglan usab niini’ng bayaran ang iya’ng giguba nga proyekto.

Apan matud ni Labella nga wala’y igo nga basehan ang pagsuspenso ni Rama kay nisunod lang kini sa mando sa balaud.

Si Department of Public Works and Highways District Engineer Fernando Cruz nimando kang Buendia nga ipatangtang ang median structure nga adunay gidak-on nga 28 metros nga nahimutang sa dalan Katipunan gumikan kay kalapasan kini sa Philippine Highway Act.

Gipasabot ni Labella nga ang proyekto iya sa barangay ug igo lang kini giaprobahan ni Rama ang desinyo apan tungod sa mando sa DPWH nga ipatangtang, iya kini’ng gipatuman.

Si Labella niawhag sa mga supporters nila nga dili mabalaka sa suspension ni Rama. Rowena D. Capistrano (BANAT NEWS)