13th month pay kinahanglang ihatag-DOLE

CEBU, Philippines – Subling gipahinumdoman ni Department of Labor and Employment Secretary Rosalinda Baldoz ang mga pribadong kompanya nga kinahanglang hatagan ang ilang mga trabahante sa ilang 13th month pay sa dili pa moabot ang Disyembre 24.

Matud ni Baldoz ang paghatag og 13th month pay ngadto sa mga trabahante usa ka labor standard requirement sa Labor Code ug duna usab kini maayong epekto ngadto sa mga trabahante sama sa gitawag nga  “good labor-management relations and increase workers’ and enterprises’ productivity and competitiveness.”

“All employers are required to pay their workers the 13th month pay, regardless of the nature of their employment, and irrespective of the methods by which their wages are paid, provided they worked for at least one month during a calendar year,” matud ni Sec. Baldoz.’’

Ang 13th month pay naglangkob sa one-twelfth (1/12th) sa basic pay nga gidawat sa trabahante sa calendar year.

Nagkanayon si Baldoz bisan og lakip sa 13th month pay ang bayad sa serbisyo nga nahatag sa usa ka empleyado apan wala malakip niini ang Cost-of-living allowance (COLA), profit-sharing payments, cash equivalents sa wala magamit nga vacation ug sick leave credits, overtime pay, premium pay, night shift differential pay, holiday pay, allowances ug monetary benefits nga wala gikonsiderar isip kabahin sa regular nga sweldo sa trabahante.

Mahimong mohatag ang employer sa katunga sa 13th month benefit sa dili pa ang regular nga pagbukas sa klase sa Mayo ug Hunyo ug ang laing katunga sa dili pa ang Disyembre 24.

Gitataw ni Baldoz kadtong mga kompanya nga dili mohatag sa 13th month benefit mahimong manubag sa money claim cases nga i-file sa bisan asa nga DOLE Regional Office.

Sigon pa ni Baldoz ang mga employers kinahanglan mohimo og report of compliance sa pinakaduol nga DOLE Regional Office matag tuig sa dili pa moabot ang Enero 15.

Nasuta sukad sa paglingkod ni Baldoz gipahugtan niya ang pagpatuman sa Labor Code ngadto sa private sector ilabi na sa paghatag sa 13th month nga dunay pagsaka sa compliance standard.

Sa tuig 2011, ang compliance rate sa paghatag sa 13th month miabot og 88.23 percent, sa 2012 misaka ngadto sa 94.76 percent ug sa 2013 ang compliance rate anaa sa 94.92 percent.

Samtang ang tuig 2014, sa 69,069 ka establisamento ug 65,301 niini ang mihatag sa ilang sa mga empleyado sa 13th month diin anaa kini sa 94.23 percent ug ang wala motuman anaa  lang sa 3,768. – /EIM) (BANAT NEWS)