Pag-ayo sa taytayan buot ipaoktaba ni Radaza
CEBU, Philippines - Gustong ipaoktaba ni Lapu-Lapu City Mayor Paz Radaza ang planong pag-ayo sa Department of Public Works and Highways ang Mandaue-Mactan Bridge tungod kay daghan pang moabot nga kalihukan sa mosunod nga tuig.
Plano untang sugdan ang pag-repair sa maong taytayan sa miaging semana apan ang DPWH miingon nga magpaabot pa sila sa final nga desisyon sa duha ka traffic chiefs sa Lapu-Lapu ug Mandaue atol sa traffic advisory o schedule niini.
"Mahimo untang i-delay, sobra man gud ka langay and there are lots of events nga mahitabo nganhi sa Cebu," matud ni Radaza, atol sa gikatahong 330 ka adlaw nga pagtrabaho sa maong taytayan.
Gitataw ni Radaza sa Banat News nga plano niyang moadto sa DPWH aron madiskusyonan ang pagpaayo sa maong taytayan tungod kay daghan ang maapektahan niini ilabi na ang mga motorista.
"Ma-discuss nako ang kana nga problem, duna lang ta'y assurance nga makuha, as to kanus-a mahuman, unsay (possibilities) nga maka create og traffic, unsaon pag-agi sa mga sakyanan, mga diversions roads," dugang ni Radaza.
Dugang niini, kinahanglan pang ipaubos og pagtuon ang maong plano aron dili makahatag og problema sa publiko.
Samtang si City Traffic Management Systems Chief nga si Frank Brazil, mipadayag nga kun mahimo, ini og kahuman na lang sa International Eucharistic Congress 2016 himuon ang repairs sa nahisgutang taytayan.
Dugang ni Brazil, wala pay panagpulong nga nahitabo tali kanila sa Mandaue apan adunay meeting ang Mactan-Cebu Bridge Management Board karong Disyembre 9 ug gipaabot nga lakip kini sa ilang tukion. (BANAT NEWS)
- Latest
