Duha ka bata patay sa dengue

CEBU, Philippines - Duha ka mga bata na usab ang nakalas tungod sa sakit nga dengue ug ning tungora sa Dakbayan sa Sugbu ug Lapu-Lapu niining semanaha.

Unang nakalas niadtong Nobiyembre 23 si Gellie Patalinghug, tinun-an sa Grade 8 sa Pajo National High School ug residente sa Sitio Sangi, Barangay Pajo sa Dakbayan sa Lapu-Lapu.

Matud pa sa amahan nga si Willy Patalinghug  niapil pa ang iyang anak niadtong Civic Military Parade subay sa kapistahan sa Birhen sa Regla apan human niadto nasakit kini ug gidala sa tambalanan.

Sumala pa ni Patalinghug dengue ang gikamatyan sa iyang anak base sa gipamahayag kaniya sa mga doktor.

Gianugnan si Patalinghug sa kamatayon sa iyang anak tungod kay nagbinugtong kini ug taas pa kaayo kini og pangandoy sa kinabuhi nga mahimong doktor. Matud niya honor student ang iyang anak ug pokus kaayo sa iyang pagtuon.

Ang ikaduhang namatay mao ang 6 anyos nga si Dumsik Laja, tinun-an sa grade 1 sa Alaska Elementary School, taga Sitio Viking Alaska sa Barangay Mambaling, Cebu City.

Matud pa sa inahan niini Aida Tumpilan, wala siya magdahom nga dengue diay gipamati sa anak dihang nauli kini gikan sa eskuylahan niadtong Nobiyembre 19 nga luya kini ug iya usab gipatomar og tambal nga naandan niining ipainom kun maglain ang lawas sa anak.

Apan pagka Nobiyembre 25 sa buntag  naglisod na ang iyang anak hinungdan nga dali nila kining gidala sa St. Anthony Mother's and Child Hospital apan gideklarar kini sa mga doktor nga patay na.

Giangkon sa inahan nga wala niya dad-a sa health center ang iyang anak kay nagtuo ra siya nga ordinaryo ra  ang hilanat ug nabalaka usab siya sa gastos.

Naabtan usab sa Banat News ang mga sakop sa Alaska Health Center nga gipangulohan sa nurse nga si Christina Tapado nga mibisita sa haya sa bata ug didto iyang gipahimangnoan ang mga residente nga batasanon gyud ang pagpanglimpyo sa ilang palibot.

Gikatakdang mopahigayon og spray ug misting sa lugar ug paghingusog sa kampanya nga kinahanglang manglimpyo gyud ang mga residente sa ilang palibot.

Sa Dakbayan sa Mandaue, subling milusad ang DepEd Mandaue City og operasyon batok sa dengue diha sa nagkadaiyang mga tunghaan gamit ang mga kahimanan nga gihatag sa Mandaue City Health Office.

 Matud ni Adeline Lujares sa DepEd-Mandaue City giseryuso gyud nila ang pagpanglimpyo sa palibot sa mga tunghaan ilabi na kadtong gidudahan nilang posibleng itlogan sa lamok. (BANAT NEWS)