CEBU, Philippines - Nikabat sa 94 ka nagparehistro’ng botante sa Lungsod sa Ginatilan ang gipetisyonan sa mga barangay kapitan tungod sa kakuwang sa residency period.
Si Provincial Election Officer, Atty. Ferdinand Gujilde, nagkanayon nga ang kapitan sa Barangay Palanas, Guianon ug Poblacion ang nireklamo batok sa mao’ng applicant voters.
Karong adlawa ang Election Registration Board (ERB) sa Ginatilan gikatakda’ng mopagawas sa desisyon kung dawaton ba ang reklamo sa mga kapitan o tugutan ba ang mao’ng applicant voters nga makaparehistro.
Giingong ang mao’ng mga aplikante dili mga residente sa lugar.
Gawas nga dili moubos sa 18-anyos, ang balaud nagmando nga kinahanglang nagpuyo na sa nasud sulod sa usa ka tuig ang botante ug unom ka buwan sa lugar diin gusto siya mobotar sa gikatakda nga eleksiyon.
Sa laing bahin, ang Commission on Elections nagsugod na sa pag-verify sa mga presinto sa mga siyudad ug kalungsuran.
Gikataho nga ang gidaghanon sa mga botante matag clustered precinct himuong 800 gikan sa kaniadto 1,000.
Gilauman nga madugangan ang mga clustered precincts ug ang Comelec nanghinaut nga dili na maghuot sa linya ang mga mobotar. (BANAT NEWS)