CEBU, Philippines - Gihatagan sa Land Transportation Franchising Regulatory Board og prangkisa ang Metro Rapid Transit System Inc. sa pagpadagan sa MyBus nga iya sa SM kinsa mag-abli sa SM Seaside City sa South Road Properties, Dakbayan sa Sugbo karong adlawa.
Matud ni LTFRB-7 Director Rey Elnar nga ang usa ka prangkisa adunay tulo ka yunit sa bus nga mobiyahe gikan sa Dakbayan sa Sugbo ug Talisay agi sa SM Seaside City via SRP Mambaling, Natalio Bacalso Avenue sa tag P25 matag pasahero.
Sayo niini gisupak sa transport groups sa Sugbo ang aplikasyon sa MRTSI sa pagkuha og prangkisa sa LTFRB.
Samtang atol sa pagbukas sa labing daku nga shopping mall sa nasud, magpakatap og mga polis ang Cebu City Police Office sa SRP karong adlawa.
Ang officer in-charge sa CCPO, Senior Supt. Marciano Batiancela, niingon nga 50 ngadto sa 80 ka polis ang ila’ng ipakatap nunot sa napanglantawan nga pagdasok sa mga tawo.
Lakip sa mohatag og seguridad ang Cebu City Public Safety Company ug ubang yunit sa kapolisan.
Ang kapolisan ang mohatag sa seguridad samtang ang traffic police ug ang Cebu City Traffic Office sa trapiko. (BANAT NEWS)